Reglugerð fyrir Menningar- og viðurkenningarsjóð KEA
KEA starfrækir Menningar- og viðurkenningarsjóð KEA sem starfa skal í samræmi við reglugerð þessa og er hún byggð á 27. grein samþykkta félagsins og gildandi lögum. Sjóðurinn og staða hans eru meðal eiginfjárliða í reikningshaldi félagsins.
1. grein
Séu skilyrði fyrir hendi ráðstafar KEA tilteknum fjármunum til menningar, íþrótta, mennta- og velferðarmála á félagssvæðinu. Stjórn KEA gerir tillögu til aðalfundar ár hvert um þá fjárhæð sem varið verður til sjóðsins í samræmi við 2. mgr. 54. gr. laga um samvinnufélög en þar er fjallað um heimildir til ráðstöfunar á tekjuafgangi. Stjórn skal við tillögugerð til aðalfundar hafa til hliðsjónar ákvæði laga um samvinnufélög sem og að horft sé sérstaklega til innleysts hagnaðar en ekki óinnleysts hagnaðar félagsins hverju sinni. Almennt skal horfa til þess að úthlutað sé úr sjóðnum á seinni hluta ársins og þá á grundvelli þeirrar tillögu um ráðstöfun til sjóðsins sem samþykkt var á aðalfundi félagsins á því ári. Stjórn sjóðsins þarf ekki að úthluta á árinu allri þeirri fjárhæð sem ráðstafað hefur verið til sjóðsins í samræmi við ákvörðun aðalfundar það árið.
2. grein
Í stjórn Menningar- og viðurkenningarsjóðs KEA eru 5 aðilar, og skulu a.m.k. 3 aðilar vera stjórnarmenn og framkvæmdastjóri KEA. Stjórn KEA skipar öll stjórnarsæti sjóðsins. Til að undirbúa og gera tillögur um ráðstöfun fjár sem aðalfundur hefur ráðstafað til sjóðsins í lið 4 b þessarar reglugerðar starfar fagráð. Fagráð metur umsóknir og gefur þeim einkunnir í samræmi við nánari leiðbeiningar þar um. Fagráðið skal skipað einstaklingum utan fyrirtækisins sem hafa haldbæra yfirsýn yfir þau verkefni sem þeim er falið og starfar það á ábyrgð framkvæmdastjóra KEA.
3. grein
Umsóknir um styrki og framlög úr sjóðnum skulu berast í gegnum heimasíðu félagsins www.kea.is. Auglýsa skal á heimasíðu KEA eftir umsóknum í tilteknum flokkum og á öðrum miðlum sem taldir eru best henta hverju sinni, einu sinni á ári eða oftar.
4. grein
Fjármunum Menningar- og viðurkenningarsjóðs KEA skal í meginatriðum skipt á milli eftirfarandi styrkja- og stuðningsflokka:
a) Menningar- og samfélagsverkefni. Um er að ræða styrki til einstaklinga, þar á meðal ungs efnilegs
fólks, félaga eða hópa sem skara fram úr eða vinna að mikilvægum mennta- og menningarmálum á
félagssvæðinu. Um getur verið að ræða málefni á sviðum félagsmála, minjavörslu, lista og hverra
þeirra málefna sem flokkast geta sem menningarmál í víðtækri merkingu. Stjórn sjóðsins getur
leitað til fagráðs í því að meta umsóknir og gefa þeim einkunn. Í einkunnagjöf fagráðs felst mat á því
hvaða umsóknir skulu teljast styrkhæfar.
b) Íþrótta og æskulýðsstykir. Almenn markmið með styrkveitingum til íþrótta og æskulýðsmála eru:
- Að stuðla að því að börn og unglingar eigi kost á einhvers konar íþróttaiðkun nálægt heimili sínu eða
skóla. - Að íþróttamenn eða lið sem skara fram úr geti stundað markvissar æfingar og sótt mót við sitt hæfi.
- Að byggja upp aðstöðu sem er líkleg til að stuðla að ofangreindum markmiðum.
- Að styðja almennt við íþrótta- og æskulýðsstarfs klúbba og félaga sem halda úti metnaðarfullu starfi á sínu nærsvæði.
Umsóknir verða að öllu jöfnu skilgreindar samkvæmt þremur flokkum, en þeir eru ungir afreksmenn í íþróttum, sérstök verkefni, stuðningur við félög. Fagráð metur umsóknir hvað varðar unga afreksmenn og gefur þeim einkunn á grundvelli staðfestra viðmiðana.
Í einkunnagjöf fagráðs felst mat á því hvaða umsóknir skulu teljast styrkhæfar.
5. grein
Allar upplýsingar sem tilheyra umsóknum og vinnslu þeirra skal farið með sem trúnaðarmál. Einstaklingar sem skipa fagráð á hverjum tíma skulu njóta nafnleyndar við störf sín.
6. grein
Gera skal grein fyrir úthlutunum úr sjóðnum á heimasíðu KEA og í ársskýrslu félagsins.
7. grein
Loforð um styrk fyrnist á tveimur árum frá því að það var gefið formlega. Ekki skal veita styrki til
verkefna nema þau séu fjármögnuð að fullu og að af þeim verði. Styrkþegar þurfa að veita styrk
viðtöku við úthlutun. Styrkþegar fá ekki úthlutað styrk 2 ár í röð nema um íþróttafélög sé að ræða.
Styrkir eru ekki veittir til hlutafélaga og opinberra aðila eða stofnanna á þeirra vegum.
Með staðfestingu reglugerðar þessarar falla úr gildi eldri reglur Menningar- og viðurkenningarsjóðs KEA.
Samþykkt á fundi stjórnar KEA í febrúar 2025.
